雙馬打吡夠晒火爆

周日西甲馬德里打吡戰，多波入之餘仲一如所料夠晒火爆。馬體會先落後下靠佐治高基扳平，加埋基比嘅世界波喺半場前反超前；而皇馬踢到完場前8分鐘先由停賽復出嘅基斯坦奴朗拿度入波，兩隊最終2:2和局收場。今場波不乏雙方球員埋牙場面，迪亞高哥斯達（紅白衫）疑似喺禁區被侵犯，點知冇判12碼之餘仲要俾球證話插水領黃牌，搞到馬體會門將教練貝高斯嬲到衝入場衝擊球證，最後拎埋紅牌；皇馬守將比比仲衰，俾向後行嘅高甸頭髮掂到，就好似中槍咁誇張倒地掩面，踢波啫，做戲咩。雙馬和波，巴塞隆拿就漁人得利，佢哋喺之後場聯賽主場，憑阿歷斯山齊士、美斯、佩奧爾同沙維各入一球，以4:1大破艾美利亞，追到只係落後榜首皇馬1分，領先第3位嘅馬體會兩分。

[img]http://static.apple.nextmedia.com/images/apple-photos/apple/20140304/large/04s5-404p.jpg[/img]


來源:蘋果日報網站