曼聯復仇兼換血　莫帥睇中拿臣囝囝？

衞冕嘅曼聯喺上周六嘅英超夜場，憑住路爾斯華倫西亞同埋韋碧克各建一功，以2:0擊敗到訪嘅史雲斯，報番足總盃被淘汰嘅一箭之仇之餘，亦終於喺2014年開齋，令受壓嘅領隊莫耶斯鬆咗一口氣。不過，據英傳媒指，莫耶斯都知道紅魔班波唔多掂，打算喺1月大清洗兼引入新血，但佢嘅目標竟然係瑞典名宿軒歷拿臣嘅16歲囝囝佐敦拿臣！

[img]http://static.apple.nextmedia.com/images/apple-photos/apple/20140113/large/13s4-414p.jpg[/img]
■韋碧克（圖）係曼聯入波功臣之一，難怪賽後獲領隊莫耶斯稱讚。美聯社

[b]傳將清洗3大瘀血[/b]
曼聯今屆由費格遜換咗莫耶斯掌帥後，表現大跌watt係人所共知嘅事實；踏入2014年，紅魔更頭頭碰着黑，一對前鋒朗尼同埋尹佩斯仍未能復出嘅同時，仲喺元旦不敵熱刺，之後喺足總盃俾史雲斯淘汰，亦喺聯賽盃4強首回合輸咗畀新特蘭，如果喺上周六嘅英超主場輸埋畀史雲斯，球隊就會53年嚟首次4連敗。不過，好彩一班紅魔球員知恥近乎勇，結果以2:0勝出，而賽後莫耶斯亦大讚今場入球功臣韋碧克同中場贊奴沙表現出色。

[b]睇中拿臣16歲囝囝[/b]
不過，讚還讚，莫耶斯都知道唔再為球隊換血，要衞冕真係好難，所以有報道指佢打算清走路爾斯安達臣、拿尼同韋費特沙夏等瘀血，騰出啲位等新兵嚟。但係，以目前情況睇，嗰啲有名氣嘅球員好似馬高列奧斯同佐治高基等，都似乎唔多吼紅魔，而莫耶斯見到佢嘅「老頂」費格遜喺2007年1月借瑞典前鋒軒歷拿臣借用3個月咁成功，於是佢又打拿臣嘅主意；但就唔係已經掛咗靴嘅42歲拿臣，而係佢個16歲嘅囝囝佐敦！
佐敦唔單止個樣同拿臣餅印咁，據講踢進攻中場嘅佢，左腳仲好厲害㖭，加上佢係巴塞青訓出身，莫耶斯今次好有眼光噃。但紅魔躉唔好開心住，因為佐敦目前仲只係效力瑞典第4級聯賽球隊侯嘉堡格（Hogaborgs BK），絕對冇大賽經驗，如果莫耶斯想佢好似當年拿臣咁第一場幫紅魔披甲就有入波，就真係諗多咗喇。

[img]http://static.apple.nextmedia.com/images/apple-photos/apple/20140113/large/img0000012_aa04.gif[/img]


來源:蘋果日報網站