卡城兵至緊要「8」蘇B真識撈

前排睇報紙，話卡迪夫城班主陳志遠好迷信，叫球會買啲生日日期入面有「8」字嘅球員返嚟，攞個諧音，希望大家都發！我求大俠初頭都係當笑話聽吓就算，點知卡城嘅第一個新援伊克林，竟然就係8月8號出世！唔知係有咁啱，定係新帥蘇斯克查識擦鞋呢？

[b]陳生買人求「發」[/b]
卡城星期三宣佈，由荷甲海倫芬簽入挪威中場伊克林，成為蘇斯克查掌帥印後嘅首個收購；據報轉會費200萬鎊（約2,600萬港元）。23歲嘅伊克林係蘇B嘅舊部，喺曼聯預備組同莫迪都跟過蘇B，但因為佢喺莫迪踢得太好，舊年俾海倫芬挖角。蘇B都知莫迪呢間小廟留唔到伊克林，無奈放人。𠵱家風水輪流轉，蘇B教緊嘅係英超球會，成功搶番愛將返嚟。
我求大俠順便望望伊克林嘅個人資料，發覺佢係1990年8月8號出世，日期入面有兩個「8」字。突然醒起，早前有英國傳媒話，卡城班主陳志遠要求球會買啲生日有「8」字嘅人返嚟，因為「8」嘅發音同「發」接近，夠好意頭；始終華人老闆都係有啲迷信。唔通蘇B為咗𠱁老闆，所以先買伊克林？

[b]陸續有來戴歷已做體測[/b]
蘇B就話佢一直都好鍾意伊克林，陳志遠亦冇干預過佢買人：「我識咗伊克林好多年，由佢喺曼聯效力開始，之後我仲帶佢去莫迪。我舊年賣佢都好無奈，佢係莫迪入面最好嘅球員。我𠵱家覺得好好運，因為可以再簽番佢，而且轉會費好合理，我覺得呢筆錢用得好實惠。佢係中場指揮官，鍾意攞波同畀波，佢嘅技術同傳球視野都好好，罰球都唔錯㗎！」聽蘇B讚到伊克林天上有、地下無，各位卡城球迷星期六就可以睇吓佢有幾多料，因為卡城周六會喺聯賽迎戰韋斯咸，伊克林仲話好想正選㖭！
除咗伊克林，蘇B仲吼中唔少舊將，包括莫迪門將尼蘭特、莫迪中場戴歷同埋漢諾威前鋒馬美迪奧夫，其中戴歷同馬美迪奧夫都踢過曼聯。據聞戴歷仲已經去咗卡城做體測，相信好快成事。

[img]http://static.apple.nextmedia.com/images/apple-photos/apple/20140110/large/img0001474_aa04.gif[/img]


來源:蘋果日報網站