傳C朗下季過PSG　想挑戰伊巴虎尾腳？

到巴黎旅行可以參觀巴黎鐵塔，或者去LV掃貨，不過睇波都可以當係節目。法甲冠軍巴黎聖日耳門（PSG）有中東大水喉，陣容已經粒粒皆星，有傳佢哋下季仲想簽埋皇家馬德里球星基斯坦奴朗拿度（C朗）；伊巴為咗保住佢「巴黎王」美譽，上周六聯賽就用虎尾腳入波㖭，先嚟個下馬威。
唔善忘嘅球迷相信都記得，C朗上個月先同皇馬續約5年，除稅後年薪去到1,800萬歐元，成為全球最高薪足球員。今次英國《太陽報》傳佢下季過檔PSG，都幾令人意外。咁啱皇馬上周六西甲主場對馬拉加，補時階段加里夫巴利博得12碼，C朗主射入網，以2:0勝出。不過C朗冇慶祝之餘，仲向觀眾席雙手合十道歉，唔通暗示佢就走人？

[b]若轉會起碼10.6億[/b]
雖然PSG有卡塔爾國有基金支持，好似有無限金錢，但如果真係買C朗，點都要幫佢計一計數。雖然C朗已經28歲，但轉會費起碼都1億歐元（約10.6億港元），而且法國行富人稅制，年薪100萬歐元以上，就要交75%稅，如果PSG畀到C朗約2,000萬歐元年薪，咁就要連稅出到8,000萬歐元。
以PSG𠵱家陣容，唔搵C朗都喺法甲超晒班，上周六主場以4:0大破巴斯蒂亞，取得聯賽4連勝，升上榜首。最精采要數伊巴10分鐘嘅入球，盧卡斯洛迪古斯右路傳中，安根達撞高少少，伊巴乖巧咁第一時間虎尾腳撞入。對於伊巴同卡雲尼各入兩粒，PSG教練白蘭斯咁講：「我好開心佢哋能夠合作，只要佢哋一齊在陣，絕不擔心入球問題。」
其實西甲競爭點都刺激過法甲，呢一周皇馬贏波，加上一對主要競爭對手巴塞隆拿同馬德里體育會齊齊失分兼8連勝走勢告終，皇馬可以拉近距離。巴塞雖然有隊長佩奧爾養傷7個月後復出，但前鋒美斯缺態，作客悶和奧沙辛拿0:0，連勝走勢告終，不過仲以8勝1和排榜首；馬體會作客以0:1不敵愛斯賓奴，只比7勝1和1負嘅皇馬多2分。

[img]http://static.apple.nextmedia.com/images/apple-photos/apple/20131021/large/img0000012_aa03.gif[/img]

來源:蘋果日報網站